مدحتِ یار میں ایک خالص لاہوری کا کلام

مدحتِ یار میں ایک خالص لاہوری کا کلام

*** *** *** *** *** *** *** *** *** ***

پہلی چائے کی چسکی جیسا ہے

کیا بتاؤں وُہ شوخ کیسا ہے

نان پائے کا اِک پیالہ ہے

ذائقہ یار کا نرالہ ہے

گرم حلوہ پوری ، اَچار ، چنے

یار کے ساتھ میری کیوں نہ بنے

جام ، مکھن لگی ڈَبل روٹی

یار چالاک ، عمر ہے چھوٹی

روغنی نان ہو حلیم کے ساتھ

یار یوں سلمٰی ہے سلیم کے ساتھ

جیسے اَنڈا ، پراٹھا ، دیسی گھی

یار کی شان ہی اَلگ ہے جی

دُودھ لَسّی میں برف کا ٹکڑا

چاند سے بڑھ کے یار کا مکھڑا

مست ماحول میں بھی اَللہ ہُو

یار پیازوں کے تڑکے کی خوشبو

یار کو کس طرح لگے مسکا

یار پھجے کے پائے کا چسکا

یار پہ جان صدقے واری ہے

یار تڑکہ لگی نہاری ہے

یار کی جان میں ہے میری جان

یار تندور سے نکلتا نان

ڈال دیتا ہے پاؤں میں زنجیر

یار چرغے کے بعد ربڑی کھیر

دیگ کا بہتریں پلاؤ ہے

یار اِک حُسن کا اَلاؤ ہے

دال میں جیسے ڈالی ہو اِملی

یار بیسن لگی تلی مچھلی

یار تشنہ نظر کی حیرانی

یار اَعلیٰ قسم کی بریانی

یار کا نام ہے ہمارا نام

یار کشمیری چائے میں بادام

تازگی قابلِ بھروسہ ہے

یار آلو بھرا سموسہ ہے

جتنا کھاؤں میں اُتنا تھوڑا ہے

یار کے ہاتھ کا پکوڑا ہے

چپس ، کیچپ کی جیسے گرم پلیٹ

یار اِتنا حسین ، اِتنا گریٹ

یار قیمہ توے پہ بھونا ہُوا

یار لیگ پیس بھاپ اُٹھتا ہُوا

یار قلفی کا آخری لقمہ

یار میلے میں ملتا قتلمہ

سُرخ ، ٹھنڈا ، رَسیلا شربتی جام

یار سگریٹ کے پہلے کَش کا نام

یار برفی سا پاک دامن ہے

یار چم چم ، گلاب جامن ہے

بھوک لگ جائے گی مزید نہ چھیڑ

یار تکہ ، کڑاہی ، بھونا بٹیر

یار نے بھوک ہی بڑھائی ہے

یار سالاد ، پھل ، مٹھائی ہے

قیسؔ کا یار قدرے ایسا ہے

آپ کا پیار کہیے کیسا ہے ؟

شہزادقیس