میرے محبوب تجھے میری محبت کی قسم

میرے محبوب تجھے میری محبت کی قسم

میرے محبوب تجھے ، میری محبت کی قسم

پھر مجھے نرگسی آنکھوں کا سہارا دیدے

میرا کھویا ہوا ، رنگین نظارہ دیدے

میرے محبوب تجھے ، میری محبت کی قسم

.

اے میرے خواب کی تعبیر میری جان ِ غزل 

زندگی میری تجھے یاد کیے جاتی ہے 

رات دن مجھ کو ستاتا ہے تصور تیرا 

دل کی دھڑکن تجھے آواز دئے جاتی ہے 

آ مجھے ، اپنی صداؤں کا سہارا دیدے 

.

بھول سکتی نہیں آنکھیں ، وہ سہانا منظر

جب تیرا حسن میرے عشق سے ٹکرایا تھا

اور پھر راہ میں ، بکھرے تھے ہزاروں نغمے

میں وہ نغمے ، تیری آواز کو دے آیا تھا

سازِ دل کو، انہی گیتوں کا سہارا دیدے

.

یاد ہے مجھ کو میری ، عمر کی پہلی وہ گھڑی

تیری آنکھوں سے کوئی ، جام پیا تھا میں نے

میری رگ رگ میں کوئی ، برق سی لہرائی تھی

جب تیرے مرمریں ، ہاتھوں‌کو چھوا تھا میں نے

آ مجھے پھر ، انہی ہاتھوں‌کا سہارا دیدے

.

میں نے ایک بار تیری ، ایک جھلک دیکھی ہے

میری حسرت ہے کہ میں ، پھر تیرا دیدار کروں

تیرے سائے کو ، سمجھ کر میں حسیں تاج محل

چاندنی رات میں ، نظروں سے تجھے پیار کروں

اپنی مہکی ہوئی زلفوں کا ، سہارا دیدے

.

ڈھونڈتا ہوں تجھے ، ہر راہ میں ہر محفل میں

تھک گئے ہیں ، میرے مجبور تمنا کے قدم

آج کا دن میری ، امید کا ہے آخری دن

کل نہ جانے میں کہاں اور کہاں تُو ہو صنم

دو گھڑی اپنی نگاہوں‌کا سہارا دیدے

.

سامنے آکے ذرا پردہ ، اٹھا دے رخ سے

ایک یہی میرا علاجِ ، غمِ تنہائی ہے

تیری فرقت نے ، پریشان کیا ہے مجھ کو

اب تو مل جا کہ میری جان پہ ، بن آئی ہے

دل کو بھولی ہوئی ، یادوں‌کا سہارا دیدے

میرا کھویا ہوا ، رنگین نظارہ دیدے

میرے محبوب تجھے ، میرے محبت کی قسم 

.

نغمہ نگار : شکیل بدایونی