اگر تمہاری انا ہی کا ہے سوال تو چلو

اگر تمہاری انا ہی کا ہے سوال تو چلومیں ہاتھ بڑھاتا ہوں دوستی کے لئے

احمد فراز کی ایک نظم جو انہوں نے بھارت میں ہونے والے ایک مشاعرے میں ہندوستانیوں کو مخاطب کر کے پڑھی تھی

گزر گئے کئی موسم کئی رتیں بدلیں

اداس تم بھی ہو یارو اداس ہم بھی ہیں

فقط تم ہی کو نہیں رنجِ چاک دامانی

جو سچ کہیں تو دریدہ لباس ہم بھی ہیں

تمہارے بام کی شمعیں بھی تابناک نہیں

میرے فلک کے ستارے بھی زرد زرد سے ہیں

تمہارے آئینہ خانے بھی زنگ آلودہ

میرے صراحی و ساغر بھی زرد زرد سے ہیں

تمہیں بھی ضد ہے کہ مشق ستم رہے جاری

ہمیں بھی ناز کہ جور و جفا کے عادی ہیں

تمیں بھی زعم کہ مہا بھارتاں لڑیں تم نے

ہمیں بھی فخر کہ ہم کربلا کے عادی ہیں

ستم تو یہ ہے کہ دونوں مرغزاروں سے

ہوائے فتنہ و بوئے فساد آتی ہے

الم تو یہ ہے کہ دونوں کو وہم ہے کہ بہار

عدو کے خوں میں نہانے کے بعد آتی ہے

بہت دنوں سے ہیں ویراں رفاقتوں کے دیار

بہت اداس ہیں دیر و حرم کی دنیائیں

چلو کہ پھر سے کریں پیار کا سفر آغاز

چلو کہ پھر سے ہم ایک دوسرے کے ہو جائیں

تمہارے دیس میں آیا ہوں اب کے دوستو

نہ ساز و نغمہ کی محفل نہ شاعری کے لئے

اگر تمہاری انا ہی کا ہے سوال تو چلو

میں ہاتھ بڑھاتا ہوں دوستی کے لئے

احمد فراز